„საქართველოს აგრარიკოსთა მოძრაობის“ მიერ შემუშავებული აგრო-ტესტირების ელექტრონული პლატფორმის საშუალებით ჩატარდა პროფესიული საჭიროებების კვლევა საქართველოს გარემოს დაცვის და სოფლის მეურნეობის სამინისტროს საინფორმაციო-საკონსულტაციო სამსახურებში, რეგიონალურ და მუნიციპალურ დონეებზე. კვლევა განხორციელდა გაეროს სურსათის და სოფლის მეურნეობის ორგანიზაციის (FAO) მიერ.

საჭიროებათა კვლევის მიზანი იყო საქართველოს გარემოს დაცვის და სოფლის მეურნეობის სამინისტროს საინფორმაციო-საკონსულტაციო სამსახურებში მომუშავე სპეციალისტების პროფესიული საჭიროებების იდენტიფიცირება და მიღებული შედეგების გამოყენება პროფესიული უნარ-ჩვევების შემდგომი გაძლიერების მიმართულებით განსახორციელებელი აქტივობების დაგეგმვის პროცესში.

კვლევა ჩატარდა საქართველოს 54 მუნიციპალიტეტში 9 რეგიონალურ და 45 მუნიციპალურ სამსახურში. კვლევის ფარგლებში განხორციელდა დისტანციური ტესტირება სოფლის მეურნეობის შემდეგ დარგებში:

• მევენახეობა.
• მეფუტკრეობა.
• ვეტერინარია.
• მეცხოველეობა.
• აგროქიმია.
• ნიადაგმცოდნეობა.
• მცენარეთა ქიმიური დაცვა.
• მემცენარეობა.
• მებოსტნეობა.
• მეხილეობა.
• მეციტრუსეობა.
• ღვინის ტექნოლოგია.
• ფიტოპათოლოგია.
• ენტომოლოგია.
• მოსავლის აღება-შენახვა.

აღნიშნული დარგების მიმართულებით კვლევის პროცესში გამოყენებული იქნა 2500-ზე მეტი სირთულის მიხედვით სორტირებული ტესტ-კითხვა. კვლევის შედეგების მიხედვით, მომზადდა და სურსათის და სოფლის მეურნეობის ორგანიზაცის გადაეცა ანგარიში,რომელიც მოიცავს კვლევის შედეგებს და პროფესიული უნარ-ჩვევების გაძლიერებისათვის საჭირო პრიორიტეტულ სასოფლო-სამეურნეო დარგებს/მიმართულებებს ტერიტორიული ერთეულების მიხედვით.